NÓS-Unidade Popular contra a entrega dos Premios Nacionais do Ministério espanhol da Cultura em Ferrol

As duas forças governantes em Ferrol anunciárom no passado dia 28 a eleiçom da nossa cidade para os actos de entrega dos prémios do Ministério espanhol da Cultura no próximo mês de Fevereiro. Tanto o PSOE como IU parecem concordar em fazer de Ferrol umha fachada da cultura em espanhol, enquanto a cultura galega e em galego continua a carecer da imprescindível igualdade de condiçons para se desenvolver plenamente, contando também com o necessário apoio das instituiçons públicas.

No caso de Ferrol, as últimas legislaturas, com governos do PP e IF, supugérom um total obscurecimento das expressons culturais galegas e em galego, em favor do pailanismo de umha direita que prefere ser espanhola de terceira a galega de primeira.

O voto de castigo da maioria do povo ferrolano exige políticas diferentes em todos os ámbitos, incluído o cultural. Por isso, de NÓS-Unidade Popular reclamamos que se abram linhas de trabalho institucional claras em apoio de todas as formas da nossa cultura, em lugar de dedicar recursos a promover outras formas culturais que contam já com suficientes apoios e lugares onde ser promocionada.

Existem numerosas iniciativas que a instituiçom ferrolana pode abordar sem ter que dedicar-se a promover os prémios à cultura em espanhol. Referiremos só algumhas possíveis:

- Porque nom convocar uns Prémios à Criaçom Musical que fagam de Ferrol o ponto de referência para a música galega e feita em galego?

- Porque nom investir desde já esforços para dar a conhecer a existência de um Prémio de Investigaçom Lingüística e Literária que leva o nome de Carvalho Calero e que nos últimos anos tem sobrevivido na mais absoluta precariedade?

- Porque nom estabelecer umha linha de promoçom económica e de recursos para a dinamizaçom de todo o tipo de iniciativas culturais com Ferrol e a Galiza como referência?

- Porque nom abrir-se, em todo o caso, à difusom de outras culturas do mundo em lugar de reduzir sempre o horizonte de referência aos limites marcados pola cultura em espanhol?

Se realmente estamos diante de um governo alternativo aos anteriores, como as duas forças governantes prometêrom, é necessário que rompam com a dependência dos referentes madrilenos e comecem a fazer da Galiza o centro da criaçom e a promoçom cultural, aberta a todo um mundo de manifestaçons culturais com que enriquecer-nos como povo.

O resto, incluída a entrega de Prémios Nacionais da cultura espanhola prevista para Fevereiro, é mais do mesmo: continuar a promover os valores que negam a nossa cultura nacional, contribuindo assim para pôr em risco a sua continuidade.

Assembleia Comarcal de NÓS-Unidade Popular
Ferrol, 02 de Janeiro de 2008

Fonte: NÓS-Unidade Popular.