[Diario de Ferrol] Unha Comisaría normalizadora

"Esto de ser garda civil ten o seu aquel. Home, arriscámonos, é certo, pero sempre queda a satisfacción de protexer ós demais, á xente pacífica que moitas veces ten que leirear con antisociais, menores e maiores, xente de fóra da lei, delicuentes de toda caste".

Así pode comezar unha espera habitualmente incómoda como a que adoita ter lugar antes de presentar unha denuncia ou realizar algunha xestión na Policía. Agora pode facerse máis curta e proveitosa coa lectura en galego.

campaña "En galego, con toda seguridade" promovida pola Xunta coa distribución dos "Contos de agardar", unha edición especial de relatos policiais que cumpren o dobre obxectivo de entreter e contribuír á normalización lingüística no ámbito policial.

As persoas que pasaron pola sala de espera da Comisaría local puideron elixir entre once títulos -agora xa quedan menos-, doutros tantos autores galegos, noveis e consagrados. "O Sinatra", de Salvador García Bodaño, "A memoria de Foolthe", de Carlos G. Reigosa; "A fuxida de Manuel", de Xosé Neira Vilas; ou "A ben dos demais", de Luís Manuel García Mañá -xefe superior da Policía Nacional en Galicia, por certo- son só algúns dos títulos desta peculiar escolma.

Colección > Son pequenos libros de menos dunha vintena de páxinas polas que desfilan diferentes historias, todas elas relacionadas dalgún xeito cos corpos de seguridade. A Ferrol foron destinados unha parte dos 60.000 exemplares que distribúen gratuitamente dende o mes de outubro nas comisarías galegas, así como nas dependencias dos corpos e forzas de seguridade do Estado, como as oficinas do DNI ou os cuarteis da Garda Civil. Na presentación da iniciativa, a secretaria Xeral de Política Lingüística, Marisol López, salientou que os "Contos de agardar" pretenden evitar que se produza a substitución lingüística "innecesaria e artificial en funcionarios e cidadáns".

Pola súa banda, o presidente da Asociación de Funcionarios para a Normalización Lingüística de Galicia, Xoaquín Monteagudo, introduce cada volume lembrando que "os cidadáns poden, xa que logo, dirixirse en galego aos policías, con toda naturalidade (...) e tamén teñen todo o dereito do mundo a que os policías os atendan nesa lingua". E, agora, ademais, a oportunidade de ler, en galego e de balde.

Fonte: Diario de Ferrol.