A organización convoca unha manifestación para o 18 de maio en Santiago baixo o lema “Polo dereito a vivirmos en galego”. Callón considera que houbo melloras na atención ao galego na CRTVG.
“Polo dereito a vivirmos en galego”. Este é o lema da manifestación que organiza a Mesa pola Normalización Lingüística en Santiago para o domingo 18 de maio. Na presentación da protesta, o presidente da organización, Carlos Callón, alertou do retroceso que sofre a lingua en ámbitos como o ensino e os medios de comunicación.
Niveis da Transición
Así, o presidente da Mesa denuncia que o emprego do galego nos medios privados do país está nos niveis máis baixos dende a Transición. Callón culpa a Xunta, en concreto á Presidencia do Goberno, de permitir que as subvencións que reciben os empresarios da comunicación para fomentar a lingua non se traduzan nun uso real do idioma. Por iso, urxe a Xunta a “tomar medidas” e a “exercer a súa responsabilidade”.
No referido aos medios públicos, a Mesa alerta do “claro retroceso” nos medios do Estado. Callón incluso asegura que o uso do galego está en “mínimos históricos na CRTVE” malia “as peticións do Parlamento, dos traballadores e da sociedade”.
Mellora na CRTVG
Polo contrario, a Mesa fala de “melloras substanciais” na CRTVG, aínda que tamén indica que “queda moito camiño por recoller”.
En opinión de Callón “non hai ningún ámbito da vida social no que non se garanta que se poida usar o galego nun 50 por cento como mínimo”. En particular atacou a Consellaría de Educación –de quen dixo que non está a facer cumprir as porcentaxes mínimas de horas en galego– e a Secretaría Xeral de Política Lingüística, á que acusou de “non actuar e ter unha liña continuísta dende tempos do Goberno do PP”.
Os conservadores e a asociación Galicia Bilingüe foron outros dos obxectivos da Mesa. Callón argumenta que este partido e a asociación que dirixe Gloria Lago están a montar unha “escandaleira cínica” ao alertar dos supostos ataques ao español no país.
Chamamento aos concellos
A Mesa agarda que a manifestación do 18 de maio sexa “masiva” e fai un chamamento a asociacións, sindicatos e outros organismos –especialmente aos concellos– a unirse á convocatoria. O manifesto da protesta será aprobado este sábado, 29 de marzo, durante a Asemblea Xeral que terá lugar na Galería Sargadelos de Santiago.
Fonte: A Nosa Terra.
quarta-feira, 26 de março de 2008
[ANT] A Mesa fala de 'mínimos históricos' do galego nos medios
domingo, 23 de março de 2008
[Vieiros] Perto de 140 adegas van etiquetar en galego a colleita deste ano
En 2007 xa o fixeron un total de 115. En 2003 tan só o facían 15 das 440 adscritas ás cinco denominacións de orixe do país.
O Parlamento manifestou este martes o seu apoio á campaña Deixa que o viño fale de etiquetaxe de viños en galego. A presidenta da Cámara, Dolores Villarino, lembrou que 115 adegas xa etiquetan actualmente na lingua do país e outras 24 comezarano a facer na colleita de 2008.
No acto, que se desenvolveu no Salón dos Reis do Parlamento, tamén estiveron presentes deputados dos tres grupos, numerosos adegueiros, e representantes dos entes impulsores da campaña: o presidente da Asociación de Funcionarios para a Normalización Lingüística, Xoaquín Monteagudo, a secretaria xeral de Política Lingüística, Marisol López, e o conselleiro de Medio Rural, Alfredo Suárez Canal.
Na súa intervención, Dolores Villarino sinalou que en 2003 só eran 15 marcas dun total de 440 adegas adscritas ás cinco denominacións de orixe de Galiza as que o facían. O obxectivo é que "mañá sexan aínda máis as que se comprometen a levar a lingua galega con elas", expresou.
A presidenta do Parlamento salientou que o galego representa "un factor positivo de mercado". "É rendíbel, tamén no mundo empresarial", apuntou. Neste senso, animou aos sectores produtivos a que se unan a este tipo de iniciativas, e expresou a máxima vinculación da Cámara.
Villarino resaltou, ademais, a boa acollida da campaña e a implicación dos adegueiros, que considerou de "especial relevancia" para a defensa e normalización do uso do galego. "Este acto consolida a alianza estratéxica entre as adegas e a nosa lingua, grazas á cal o galego é presentado en todo o mundo", afirmou.
Identificación coa terra
Pola súa banda, o vicepresidente de Adegas Martín Códax, Ramón Barral, destacou en nome dos adegueiros que o viño é "un dos produtos máis identificados coa terra", tras o cal sentenciou que "ninguén dubida de que o viño galego debe falar galego".
Barral subliñou que "o viño e a lingua levan moitos anos camiñando xuntos" e advertiu de que a utilización da lingua "é máis que unha opción, é unha esixencia". Finalmente, explicou que o uso do galego na etiquetaxe "demostrou ser un exercicio de coherencia e unha estratexia comercial axeitada".
Fonte: Vieiros.
sábado, 22 de março de 2008
[AGAL] Novo Anteprojecto de Lei do Consumo da Galiza inclui pola primeira vez referências aos direitos lingüísticos
Meios defensores da hegemonia do espanhol acusam o novo texto de querer “multar as empresas que nom contratarem em galego”.
PGL - O texto proposto pola Conselharia da Inovaçom e a Indústria da Junta da Galiza no passado dia 14 de Março é ainda um Anteprojecto de Lei. Entre as novidades que apresenta, encontra-se um reconhecimento para alguns direitos lingüísticos da comunidade lingüística galega.
[+...]
Em concreto, os três artigos do capítulo 4º, intitulado ‘Direitos lingüísticos dos consumidores’, dim respeito ao ‘Direito ao uso de qualquer das línguas oficiais’, à ‘Língua das condiçons gerais da contrataçons’ e ao que chamam ‘Fomento do uso do galego’, respectivamente.
No primeiro deles, estabelece-se o direito dos consumidores e consumidoras ao uso do galego nas suas relaçons comerciais no território da Comunidade Autónoma da Galiza, sem que podam sofrer qualquer discriminaçom por esse motivo; no segundo, acrescenta-se que a consumidora ou o consumidor poderám ‘exigir’ que as ‘condiçons gerais da contrataçom’ lhes sejam proporcionadas em galego; e no terceiro estabelece-se um compromisso inconcreto por parte da Junta da Galiza para “‘fomentar” o uso do galego “nas relaçons dos profissionais e empresários com os consumidores”.
Apesar de nom ir mais longe do que isso, entidades e meios contrários a qualquer reconhecimento para o galego, como Galicia Bilingüe ou o jornal Libertad Digital já figérom públicos protestos polo que consideram umha tentativa de “eliminar o castelhano a golpe de sançons e multas” (sic).
Partem os defensores do espanhol da consideraçom de ‘infracçom leve’ para o que no artigo 51 do referido Anteprojecto se define como “a vulneraçom dos direitos lingüísticos reconhecidos pola Lei aos consumidores e usuários ou impedimento do seu exercício”.
As infracçons leves serám punidas, caso o texto venha a ser aprovado, com multas de até 3.000 euros, o que estabeleceria pola primeira vez um regime legal de protecçom para alguns direitos lingüísticos dos e das utentes de galego no ámbito das relaçons comerciais na Comunidade Autónoma da Galiza.
Fonte: PGL.
sexta-feira, 7 de março de 2008
Sobre a política lingüística das televisons locais em Ferrol
Por iniciativa de um dos seus mais qualificados membros, o Conselho Municipal de Língua começou já a abordar um problema velho que se tornou mais grave durante as últimas duas legislaturas: os canais de televisom locais (Canal 31 e Localia) excluem explicitamente o galego das suas programaçons, sem que o Governo municipal faga nada, a nom ser financiá-los por publicidades institucionais amiúde também em espanhol.
Nom é fácil explicar o mecanismo mental que pode estar a funcionar nas cabeças das pessoas responsáveis polas empresas promotoras de Canal 31 e de Localia para fazerem umha tam clara discriminaçom de um idioma tam arreigado na nossa comarca como é o galego. Trata-se de desconhecimento? de inércia por anos de explícita marginalizaçom? talvez de critérios empresariais? quais critérios?
Insistimos, nom é fácil explicá-lo. Será que pretendem que, se alguém que nom conheça a realidade lingüística da nossa comarca e tenha acesso à mesma só através das suas ondas, acredite que em Ferrol e a sua comarca o espanhol é a única língua de uso social?
Se assim fosse, as empresas que sustentam os canais televisivos locais estariam a fracassar, pois nom conseguem evitar que apareçam intervenientes que, 'rompendo o protocolo', falam num idioma que muitos ferrolanos e ferrolanas falamos dia a dia, como é lógico.
Porque entom esse pseudo-segregacionismo lingüístico nuns meios que teoricamente estám aí para servirem à audiência, para reflectirem a realidade da comarca? porque esse sesgo ideológico que parece partir da necessidade de conduzir o galego à mais absoluta marginalidade? Porque politizam o galego desse jeito?
Sendo dificilmente explicável todo este assunto, mais inexplicável nos parece que a instituiçom municipal ferrolana continue a financiar esses dous meios de comunicaçom que desprezam de maneira tam clara o idioma que os nossos governantes deveriam situar, segundo as leis que eles aprovárom, no mesmo nível de uso social que o espanhol.
Decorreu segunda reuniom plenária do Conselho Municipal de Língua
A sede municipal de Ferrol acolheu no dia 5 de Março a segunda reuniom do organismo de participaçom cidadá para a àrea normalizadora do idioma, o Conselho Municipal de Língua, duas semanas depois da primeira reuniom, de carácter inaugural. Nesta ocasiom, o tema principal da ordem de trabalhos foi a emenda e aprovaçom do regulamento interno do organismo.
Tal e como anunciamos, a nossa entidade informará das reunions em que o nosso representante participe, pois achamos fundamental dar a conhecer os trabalhos e problemas que o Conselho Municipal de Língua afronte, com total transparência.
Composiçom
Nesta segunda reuniom, realizada na sede municipal na passada quarta-feira, voltou a haver representaçom dos partidos institucionais e de diferentes sectores sociais (nomeadamente sindical, vicinal, de meios de comunicaçom, empresarial, de entidades de renovaçom pedagógica e ambiental), incluída umha representaçom da Fundaçom Artábria como entidade normalizadora.
Aprovaçom do regulamento
Após a discussom de algumhas emendas, o regulamento foi aprovado unanimemente, umha vez que se considerou válido como quadro de actuaçom de um organismo que, lembremos, tem só um carácter consultivo ou colegiado, e nom decisório.
Diferentes representantes dos movimentos sociais coincidírom em sublinhar que o importante é começar a desenvolver-se trabalho prático e concreto, no quadro do Plano de Normalizaçom aprovado por unanimidade do Pleno Municipal em 2003 e nunca aplicado até hoje.
Informaçons solicitadas na reuniom anterior
Representantes do governo municipal informárom parcialmente sobre as explicaçons requeridas na reuniom anterior por algumhas entidades, em relaçom ao uso quase exclusivo do espanhol nos canais televisivos locais, apesar de existirem acordos com a Cámara Municipal ferrolana, que deveriam incluir a exigência de que o nosso idioma tenha presença significativa nesses meios.
O tema nom ficou fechado, até porque as explicaçons nom fôrom completas e o problema continua a manifestar-se cada dia em canais como Localia e Canal 31.
Outros temas tratados
Além do mais, a Artábria lembrou novamente a importáncia de que os cargos públicos assumam o uso público do galego e a necessidade de umha formaçom lingüística que permita que os e as políticas municipais tenham umha competência suficiente em galego, o que hoje nom acontece. Há que insistir em que o próprio Plano de Normalizaçom Lingüística inclui como medida concreta o uso habitual do galego por parte da instituiçom municipal, o que hoje só se cumpre parcialmente na comunicaçom escrita.
Também reclamamos um controlo dos usos lingüísticos por parte da instituiçom municipal às empresas privadas que gerem serviços públicos, como é o caso de EMAFESA, nomeadamente no atendimento oral à vizinhança. Outros colectivos coincidírom na necessidade de
À espera de umha nova reuniom em que comecem a dar-se passos na formaçom de grupos de trabalho, a Artábria continuará a participar no Conselho Municipal de Língua no sentido de fazer sentir a necessidade de medidas concretas favoráveis à extensom dos usos sociais do galego, com destaque para os dous ámbitos marcados como prioritários polo Conselho: o da Administraçom local e o socioeconómico.
A próxima reuniom será convocada para dentro de um mês. A Fundaçom Artábria continuará a participar e a informar sobre as decisons tomadas e o seu grau de cumprimento e utilidade para o avanço dos direitos lingüísticos em Ferrol.
"Libertad y determinismo": a Universidade da Corunha e o Governo municipal de Ferrol promovem Jornadas universitárias em espanhol
Será que as nossas autoridades ainda consideram o galego 'inválido' para a comunicaçom de ideias científicas? Isso parece, se virmos as jornadas apresentadas ontem no Cámpus ferrolano polo reitor da UDC, José María Barja, e o presidente da Cámara de Ferrol, Vicente Irisarri. Ambos inaugurárom em espanhol umhas jornadas cujo programa se desenvolve integralmente em espanhol.
Tanto a Universidade da Corunha como a Cámara Municipal de Ferrol tenhem textos legais que manifestam a obrigatoriedade de dar ao galego um papel protagónico na comunicaçom de ambas instituiçons com a sociedade. Porém, mais umha vez, os seus máximos representantes teimam em convencer-nos de que todo isso nom vale para nada, e que eles som os primeiros a incumprir normas aprovadas inclusive unanimemente, respectivamente, polo claustro universitário e polo pleno municipal.
Programa, publicidade, comunicaçons... todo nestas Jornadas, que decorrem entre ontem e hoje em Ferrol, indica a nula vontade real de fazer avançar o nosso idioma por parte de boa parte dos responsáveis políticos que padecemos em Ferrol e, em geral, na Galiza.
