[A Nosa Terra] Resposta da Xunta á Mesa: Case 4000 docentes acoden a cursos de formación en galego

Ana Camiño. Tras o informe presentado pola Mesa pola Normalización Lingüística sobre o galego no ensino, Educación alega as súas razóns.

O informe da Mesa pedía á Xunta que puxese en marcha de forma “urxente” cursos de formación para profesorado en lingua galega, facilitando así aos profesionais que impartan a metade das materias en galego.

Neste sentido, a Consellería indicou hoxe a A Nosa Terra que durante o pasado curso 2006/2007 se realizaron un total de 15 cursos de formación para profesorado en galego, ao que acudiron un total de 380 profesionais.

4000 prazas

Neste curso académico 2007/2008, o número de docentes que asisten a estes cursos elevouse a 3.960, que asisten a 85 cursos organizados polo departamento que dirixe Laura Sánchez Piñón.

Pouco material en FP

A Mesa indicou tamén que o material escolar-- que tamén debe adaptarse ao decreto de uso da lingua galega-- non está en galego na maioría dos centros de formación profesional e ensinanzas musicais.

Neste eido, a Xunta alegou que a maior parte das materias neste tipo de estudos son de carácter práctico e que “apenas hai libros”.

Fonte: A Nosa Terra.