[gznacion] A Xunta triplicou no 2007 as axudas para a normalización lingüística

A Xunta triplicou o pasado ano as axudas destinadas a normalización lingüística na Administración local, con 746.500 euros fronte aos 202.000 euros investidos en 2004, que beneficiaron a 113 municipios, 36 máis que tres exercicios antes.

Así o destacou hoxe a directora xeral de Administración Local, Matilde Begoña Rodríguez Rumbo, en resposta a unha pregunta do Grupo do BNG na Comisión de Educación e Cultura, e engadiu que en 2007 se impartiron 22 cursos de lingua galega fronte aos 13 desenvolvidos en 2004 para o coñecemento da lingua galega no ámbito da Administración municipal.

O deputado nacionalista Bieito Lobeira sinalou que na actualidade hai en Galiza uns 80 SNL noutros tantos municipios galegos, superando os 48 servizos existentes en 2007. Con todo, subliñou que só cobren o 25% dos concellos galegos mentres que "o 75% non posúen unha estrutura estábel de normalización lingüística".

Ademais, Lobeira incidiu no feito de que 53 Servizos de Normalización Lingüística están ao amparo dos convenios correspondentes asinados pola Deputación Provincial da Coruña.

Tamén incidiu no "problema da precariedade laboral" dos traballadores dos SNL e puntualizou que "boa parte" destes departamentos dedícanse á tradución de textos en detrimento de a súa función dinamizadora da lingua. Lobeira recalcou que a Secretaría Xeral de Política Lingüística destina aos concellos "un quinto do montante" que achega ás subvencións dos medios de comunicación para fomentar o uso do galego "cun resultado que é patético".

Con todo, o deputado do BNG manifestou que a lei que regula o uso do galego na Administración local "é raquítica" e remóntase a 20 anos atrás, á vez que denunciou que "aínda segue sen cumprirse". Así mesmo, considerou que "sería bo" que a Consellería de Presidencia unificase unha serie de criterios de funcionamento dos SNL "que lles desen coherencia no conxunto do territorio".

Fonte: gznacion.