Artábria participou na reuniom constituinte do Conselho Municipal de Língua

No passado dia 21 decorreu na sede municipal de Ferrol a reuniom constituinte do Conselho Municipal de Língua, com um atraso importante se tivermos em conta que a actual legislatura começou no passado mês de Junho.

A Fundaçom Artábria conta com um representante neste organismo, concebido teoricamente para favorecer a participaçom cidadá, e que nas últimas duas legislaturas estivo congelado pola falta de interesse dos sucessivos governos.

É, portanto, umha boa notícia que se reactive o Conselho Municipal de Língua, sempre que sirva para começar a cumprir a Ordenança aprovada em 1997 por unanimidade e o Plano de Normalizaçom, de 2003, algo que está longe de acontecer por parte da instituiçom local ferrolana.

Nesse sentido se pronunciárom o nosso representante e outros integrantes do organismo na reuniom de hoje. Pola nossa parte, a Fundaçom Artábria fará a partir de agora especial seguimento da política lingüística da instituiçom municipal ferrolana e tentará contribuir construtivamente para que o Conselho Municipal de Língua sirva para mais do que tem servido nos últimos anos.

Ao mesmo tempo, ficamos a dispor de propostas e ideias que qualquer ferrolano ou ferrolana defensor dos nossos direitos lingüísticos queira fazer chegar a esse organismo institucional de participaçom em que estaremos presentes como entidade que trabalha no ámbito normalizador.

Aqui informaremos da dinámica que leve e da nossa actividade no seu seio.