Nova reuniom do Conselho Municipal de Língua

Na passada quinta-feira reuniu-se o Conselho Municipal de Língua, em que a Fundaçom Artábria participa desde a sua posta em andamento. O plenário do organismo municipal de participaçom aprovou abrir um prazo para a apresentaçom de propostas de pessoas que integrem as comissons de trabalho que irám ser criadas na próxima reuniom do Conselho, no mês próximo.

Representantes de todos os grupos municipais e das entidades sociais integradas no Conselho Municipal de Língua realizárom umha nova reuniom na passada semana, em que foi avaliada criticamente a escassa presença do nosso idioma nas celebraçons religiosas da passada Páscoa, fortemente financiadas pola Cámara Municipal de Ferrol.

O representante do governo municipal no organismo, Javier Galán, comprometeu-se a que em futuras ediçons da Páscoa haja umha presença importante do galego, como parte das condiçons que a Cámara inclui nos subsídios a entidades sociais e privadas, como é o caso das Confrarias que organizam a Páscoa ferrolana.

A seguir, passou-se a aprovar a conformaçom de duas grandes comissons de trabalho, umha dedicada ao ámbito socioeconómico e outra ao sociocultural, que poderám incluir iniciativas e campanhas dedicadas a campos mais concretos, como o desportivo, o comercial, etc.

Abriu-se no fim da reuniom um prazo para que as entidades fagam propostas de pessoas que podam integrar essas comissons, que dependerám do plenário do Conselho Municipal de Língua, organismo que voltará a reunir-se no mês próximo.